Servizo Municipal de Educación

O Servizo Municipal de Educación é o departamento do Concello da Coruña responsable de xestionar as competencias educativas municipais e de promover e xestionar as intervencións de apoio á educación que se planifican dende a Concellería de Educación da Corporación Municipal.

Os programas municipais de educación teñen como primeiros destinatarios os alumnos do municipio, polo que están abertos a todos os centros educativos con independencia da súa titularidade xurídica. No caso de que a dispoñibilidade de prazas o permita, os programas están tamén abertos aos centros educativos da mancomunidade de municipios da Coruña nas mesmas condicións. Os centros educativos de fóra desta mancomunidade poden tamén acceder a estes programas cando queden prazas dispoñibles.

Un dos obxectivos da actuación municipal en materia educativa é ofrecerlles aos centros escolares programas estables, de xeito que estas actividades poidan integrarse tanto no Proxecto Educativo do Centro (PEC), coma no seu Proxecto Curricular (PPC) e nas súas Programacións xerais anuais (PGA).

Por este motivo, o Servizo Municipal de Educación organiza actividades que se reiteran duns cursos a outros, para lles facer posible aos centros escolares unha planificación da participación a longo prazo.

Ao mesmo tempo, é tamén obxectivo municipal dotar os seus programas de materiais didácticos de apoio que aseguren a axeitada explotación destes en termos de aprendizaxe. A elaboración destes materiais require a colaboración activa dos profesores co fin de que resulten axeitados ás súas necesidades e coherentes coas súas estratexias didácticas.

• Competencias
• Publicacións

Servizo Municipal de Educación

Sede:

Casa Paredes

Avda. da Mariña, 18 - 2ª planta

CP 15003 A Coruña

Teléfono: 981 184 396

Fax: 981 184 397

Correo electrónico: educacion@coruna.es

Consultas sobre programas: anaj@coruna.es

Web: edu.coruna.es

Horario de atención ao público:

• De luns a venres de 9 a 14 h.

 

Concelleiro da Área de Benestar e Cooperación:

• Carlos González-Garcés Santiso

Programas educativos do Servizo Municipal de Educación

O deseño e a creación destes programas educativos municipais, responsabilidade do Servizo Municipal de Educación, responde á aplicación conxunta dos seguintes principios:

• Subsidiaridade: As intervencións municipais teñen que ser complementarias ao currículo escolar; deben servir para reforzalo, non para suplilo, ni para contrapoñerse a el.
• Complexidade: As actuacións municipais teñen que centrarse naqueles campos que superen a capacidade de organización dos centros escolares individuais. Por exemplo: a organización dun ciclo de concertos, dunha temporada de teatro para nenos, etc.
• Universalidade: A actuación municipal ten que estar aberta a todos os centros docentes do municipio.
• Liberdade: Os centros deben libremente decidir a súa participación naqueles programas e actividades que desexen.
• Integración: O Concello debe esixirlles aos centros que a súa participación nun programa determinado estea condicionada á súa inclusión no proxecto educativo e no plan anual do centro, de modo que quede integrada no plan de formación deseñado para os seus alumnos.
• Estabilidade: As actuacións municipais deben ser estables ao longo do tempo co fin de lles garantir aos centros escolares a continuidade necesaria para planificar os seus proxectos educativos.
• Empatía: A actuación municipal debe procurar a implicación dos profesores no desenvolvemento das actividades programadas, tanto durante o seu desenvolvemento, como na preparación de materiais e recursos didácticos que sirvan para a súa explotación didáctica.

A política de colaboración subsidiaria cos centros educativos do municipio establecida pola Concellería para mellorar a calidade da educación no municipio lévase a cabo por medio dos Programas Educativos Municipais, que se desenvolven arredor de 10 eixes temáticos: Descubrir Coruña, Descubrir o teatro, Descubrir a música, Descubrir os libros, Descubrir a informática, Descubrir os estudos, Descubrir o ocio, Descubrir a participación, Descubrir o Mundo e Madrugadores.